Fékk að róta eftirlitslaus í gögnum saksóknarans

Starfsmaður skiptastjóra Milestone ehf. hafði ótakmarkaðan og eftirlitslausan aðgang að rannsóknargögnum embættis Sérstaks saksóknara í tvo daga. Þetta kemur fram í yfirheyrslu yfir starfsmanninum í tengslum við rannsókn á tveimur fyrrverandi starfsmönnum Sérstaks saksóknara.

Verjandi Karls Wernerssonar hefur sent Ríkissaksóknara kröfu um afhendingu gagna vegna þessa. Hann gagnrýnir harðlega þetta verklag sem hann segir meðal annars fela í sér gróft brot gagnvart Karli, brot á almennum hegningarlögum og ákvæðum stjórnarskrárinnar og mannréttindasáttmála.

Verjandinn, Ólafur Eiríksson hæstaréttarlögmaður, kærði embætti Sérstaks saksóknara til Ríkissaksóknara vegna aðgangs skiptastjóra að rannsóknargögnum embættisins og krafðist rannsóknar á starfsháttum þess.

Kærunni var vísað frá þar sem ekki var talið tilefni til frekari rannsóknar og málið ekki nægilegt eða líklegt til sakfellingar. Verjandinn óskaði bréflega eftir rökstuðningi Ríkissaksóknara á niðurfellingunni. Í bréfinu kemur fram að þar sem ekki sé hægt að kæra niðurstöðu Ríkissaksóknara um niðurfellingu málsins sé ómögulegt að meta, án rökstuðnings, hvort fullnægjandi rannsókn hafi átt sér stað. Verjandinn telur þær upplýsingar sem hann hafði þá sýna að gróflega hafi verið brotið á rétti hans af hálfu yfirvalda. Frekari rökstuðningur fyrir ákvörðuninni var ekki veittur af embætti Ríkissaksóknara.

Í minnisblaði sem saksóknari hjá Ríkissaksóknara sem sá um rannsókn málsins sendi Sigríði Friðjónsdóttur í júlí 2012, kemur fram að aðgangur að gögnum virðist ekki hafa verið í föstum skorðum hjá embætti Sérstaks saksóknara.

Starfsmaður Milestone segir í yfirheyrslunni að haustið 2010 hafi sér verið veitt heimild frá sérstökum saksóknara, meðal annars til að „róta“ í gögnum í skjalageymslu án eftirlits. Hann hafi verið á gangi þar sem gögn í tengslum við Milestone málin hafi verið vistuð en þar hafi einnig verið fleiri gögn tengd öðrum málum.

Verjandi Karls krefst þess að fá aðgang að gögnunum eigi síðar en í dag.