Vinnsla að komast í fyrra horf

Um fjörutíu manns vinna við fiskvinnslu hjá Arctic Odda á Flateyri en það er álíka fjöldi og vann hjá Eyrarodda sem var stærsti vinnustaðurinn þar til fyrirtækið varð gjaldþrota í upphafi árs 2011.

Síðan þá hefur fiskvinnsla gengið brösuglega á Flateyri. Í fyrra hætti Lotna rekstri og Arctic Oddi þurfti að segja upp starfsfólki, en nú hefur aftur verið fjölgað í starfsliðinu og Bryndís Sigurðardóttir framkvæmdastjóri segir bjart fram undan.

Hún segir að Byggðastofnun hafi úthlutað fyrirtækinu 300 tonna kvóta á ári næstu þrjú árin. „Við eigum tvö ár eftir en þá verður fiskeldið komið á það stig að við höfum úr nógu að moða,“ segir hún. Dýrfiskur, sem er systurfyrirtæki Arctic Odda, er með fiskeldi í Dýrafirði og Tálknafirði.

Íbúum hefur svo og fjölgað lítillega á þessu ári en þeir voru komnir niður fyrir tvö hundruð á síðasta ári samkvæmt tölum Hagstofu en eru nú 204. Árið 2007 voru íbúarnir hins vegar 337.