Flugvél Loftleiða breytt í eitt stórt fyrsta farrými

Loftleiðir Icelandic, dótturfélag Icelandair Group, hefur gert fimm ára samning um leigu á farþegaþotu til franska flugfélagsins La Compagnie. Flugfélagið ætlar að nota vélina í áætlunarflug á milli Parísar og Newark í Bandaríkjunum og eingöngu selja ferðir á fyrsta farrými.

„Um borð í vélinni verða eingöngu svokölluð „lie-flat“ sæti sem hægt er að leggja niður svo farþegar geti sofið þægilega í þeim. Vélin verður því öll hin glæsilegasta að innan,“ segir Sigfús Ólafsson, markaðsstjóri Loftleiða Icelandic.

Farþegaþotan sem um ræðir er af gerðinni Boeing 757-200. Hún er nú í Indianapolis í Bandaríkjunum þar sem unnið er við breytingar á vélinni. La Compagnie ætlar að hefja áætlunarflugið í júlí.

„Vélin fer inn á franskt flugrekendaskírteini og flugfélagið mun reka hana í sínum flota en fá viðhaldsþjónustu frá okkur,“ segir Sigfús. Hann segir flugvirkja Icelandair í París og þjónustuaðila fyrirtækisins í Newark koma til með að sjá um viðhald á vélinni.

Mörg erlend flugfélög buðu áður upp á ferðir yfir Atlantshafið þar sem eingöngu voru í boði sæti á fyrsta farrými. Á meðal þeirra voru Silverjet, MAXjet og L'Avion. Þau gáfust þó upp á ferðunum þegar alþjóðlega fjármálakreppan skall á.

La Compagnie ætlar aftur á móti að bæta annarri vél við flota sinn. Sigfús segir bæði fyrirtækin áhugasöm um að kanna möguleikann á því að hún komi einnig frá Loftleiðum. Samstarfinu fylgi mikil verkfræði- og eftirlitsvinna og að sú vinna fari öll fram í Keflavík.

„Þetta er mjög ánægjulegt fyrir okkur því við erum orðnir miklir sérfræðingar í þessum geira. Við höfum verið með „VIP“-þotu sem hefur farið með sterkefnaða Ameríkana í heimsreisur. Það er orðinn mikilvægur þáttur í tekjuöflun okkar.“

Sigfús segir vél Loftleiða hafa farið í yfir tuttugu heimsreisur á síðustu tíu árum. Flogið er með íslenskri áhöfn; flugfreyjum, hlaðmönnum, flugvirkjum og kokkum.

„Við verðum áfram á þeim vettvangi og munum einnig bæta þessum „lie-flat“-sætum í þá vél.“