Nota Snjallposa frá Handpoint

Borgun og íslenska nýsköpunarfyrirtækið Handpoint hafa gert með sér samning um að Borgun bjóði upp á Snjallposa Handpoint.

Með Snjallposanum geta fyrirtæki og einstaklingar tekið við greiðslum í snjallsíma eða spjaldtölvu. Einfalt er að tengja lausnina við kassakerfi og hentar hún því breiðum hópi viðskiptavina.

„Það er fagnaðarefni að eins öflugt fyrirtæki og Borgun bjóði viðskiptavinum sínum upp á þessa nýjung sem á eftir að breyta greiðsluþjónustu til framtíðar. Það er okkar sýn að spjaldtölvur og snjallsímar muni að mestu leyti leysa af hefðbunda afgreiðslukassa á næstu árum,“ segir Davíð Guðjónsson, framkvæmdastjóri Handpoint.

Samstarf fyrirtækjanna mun bjóða upp á enn fleiri tækifæri í framtíðinni með stöðugri þróun snjallgreiðslulausna Handpoint, segir í tilkynningu frá Handpoint.

„Það er okkur sönn ánægja að bjóða upp á þessa nýjung í móttöku greiðslna. Með því að bjóða upp á Snjallposa eykur Borgun vöruframboð sitt og kemur til móts við síbreytilegar þarfir viðskiptavina sinna,“ segir Haukur Oddsson, forstjóri Borgunar.