Starfsfólk Landsbankans flúði myglusvepp

Um 80 starfsmenn Landsbankans þurftu að yfirgefa starfsstöðvar sínar þegar myglusveppur fannst í höfuðstöðvum bankans og á skrifstofum hans í Landsímahúsinu við Austurvöll á síðasta ári.

Landsbankinn rekur starfsemi í sextán húsum. Þar af eru fjórtán í miðborginni og flest þeirra eru hluti af höfuðstöðvum bankans við Hafnar- og Austurstræti. Myglan fannst í þremur húsum í Hafnarstræti, tveimur í Austurstræti og á skrifstofunum í Landsímahúsinu.

„Starfsfólk bankans fór að rekja tíð veikindi til húsnæðisins og því byrjuðum við á að kaupa myglupróf. Þá kom í ljós mygla á einum eða tveimur stöðum og eftir það fundum við meira. Á endanum þurfti meðal annars að flytja og dreifa öllu áhættustýringarsviði bankans, um fimmtíu manns, á nokkra staði hér í höfuðstöðvunum, en deildin er staðsett í fjórum húsnúmerum,“ segir Valgeir Valgeirsson, forstöðumaður eignasviðs Landsbankans.

„Starfsmennirnir í Landsímahúsinu, um þrjátíu manns, voru fluttir til innan þess húss og við fórum strax í að losa okkur við sveppinn.“

Bankinn leigir allar þær byggingar sem um ræðir. Eigendur þeirra þurftu að sögn Valgeirs að fara í miklar framkvæmdir við að rífa niður loft og veggi og eitra fyrir sveppinn.

„Framkvæmdunum lauk snemma á þessu ári og sveppurinn hefur ekki komið upp í öðrum húsum síðan,“ segir Valgeir og bætir við að framkvæmdirnar hafi tekið nokkra mánuði.

„Við teljum því að þetta sé komið í lag en við getum aldrei verið viss. Húsin eru nefnilega gömul, byggð frá 1924 til 1970, og mörg hafa lekið á einum eða öðrum tíma sem getur leitt til myglusvepps.“

Valgeir segir starfsfólk bankans hafa fundið fyrir einkennum sem oft eru tengd við myglusvepp eins og hausverk og sljóleika.