Hefur næstum náð sér að fullu

Íbúðamarkaður hefur næstum náð sér að fullu frá hruni, að því er fram kemur í nýrri skýrslu sem Reykjavík Economics vann fyrir Íslandsbanka. „Staðan á íbúðamarkaði markar endurreisn,“ segir í tilkynningu bankans.

„Byggingariðnaðurinn hefur tekið við sér og er mikið um íbúðir í smíðum og nýjar íbúðir seljast ágætlega,“ segir þar.

Skýrslan segi að þótt íbúðamarkaður sé í jafnvægi, séu allar líkur til þess að íbúðaverð hækki meira á þessu ári. Það skýri væntingar um aukinn kaupmátt, stöðugt verðlag og svipað vaxtastig.

Í skýrslu Reykjavík Economics segir að þegar horft sé til hækkunar umfram verðbólgu sjáist að samkvæmt vísitölu íbúðaverðs Þjóðskrár hafi íbúðir á höfuðborgarsvæðinu að jafnaði hækkað um 2,6 prósent 2013.



Einnig að miðað við vísitölu raunverðs íbúðarhúsnæðis sé íbúðaverð svipað í febrúar 2014 og í nóvember 2004, sem markað hafi upphaf síðustu fasteignabólu.