Gjaldþrot fimmtungi færri í mars

Nýskráningum einkahlutafélaga síðustu tólf mánuði (apríl 2013 til mars 2014) fjölgaði um níu prósent, borið saman við mánuðina tólf þar á undan.

Í tölum Hagstofunnar kemur fram að fram í mars 2014 hafi 1.942 félög verið nýskráð, flest í fjármála- og vátryggingarstarfsemi, eða 325. Sé hins vegar einungis horft til marsmánuðar kemur í ljós að nýskráningar í síðasta mánuði og í mars í fyrra voru jafnmargar, eða 170.

Þá kemur fram í gögnum Hagstofunnar að heldur dragi úr gjaldþrotum fyrirtækja milli ára. Sé einvörðungu horft til marsmánaða á þessu ári og í fyrra nemur samdrátturinn 20 prósentum, 68 gjaldþrot í ár, en 85 í fyrra.

Síðustu 12 mánuði hafa gjaldþrot hins vegar dregist saman um sex prósent.

Frá apríl til mars á þessu ári voru 926 fyrirtæki tekin til gjaldþrotaskipta, 186 í byggingarstarfsemi og mannvirkjagerð.