Sex af hverjum tíu hótelum í borginni skiluðu tapi 2012

Hótel á höfuðborgarsvæðinu voru að meðaltali rekin með tapi á tímabilinu 2009-2012. Einungis 40 prósent þeirra skiluðu hagnaði árið 2012 samanborið við 70 prósent hótela á landsbyggðinni.

Þetta kemur fram í nýrri úttekt KPMG á arðsemi í hótelrekstri hér á landi sem fyrirtækið kynnti í gær. Þar er greint frá afkomu hótelgeirans og þeirri staðreynd að helmingur hótela höfuðborgarsvæðisins var með neikvætt eigið fé árið 2012 samanborið við 43 prósent á landsbyggðinni. Á sama tíma og afkoma hótela á höfuðborgarsvæðinu var að jafnaði léleg var herbergjanýting þar talsvert betri en annars staðar á landinu.

„Það er alveg ljóst að ef við ætlum að taka á móti þessum mikla fjölda ferðamanna þá þarf að byggja upp og kosta til og þá eru menn oft með neikvætt eigið fé til að byrja með. En við erum að sjá aukningu og nýtingin er að batna,“ segir Helga Árnadóttir, framkvæmdastjóri Samtaka ferðaþjónustunnar (SAF).

„Það að byggja upp og fjölga hótelum kallar á miklar fjárfestingar yfir skamman tíma. Lykilatriðið er þessi fjölgun ferðamanna yfir allt árið sem býr til grundvöll fyrir bætt rekstrarumhverfi og þá verður hægt að horfa til þeirra markhópa sem gefa meira af sér,“ segir Helga.

Í úttekt KPMG er bent á að mun fleiri hótelrekendur á höfuðborgarsvæðinu leigja húsnæði undir starfsemi sína en kollegar þeirra á landsbyggðinni. Samkeppni um vel staðsett húsnæði í góðu ásigkomulagi sé mikil og leiguverð því hærra en annars staðar. KPMG telur háan húsnæðiskostnað og meiri verðsamkeppni í borginni líklegar ástæður fyrir verri afkomu hótela á höfuðborgarsvæðinu.

„Þar er einnig búið að byggja mikið af þriggja og fjögurra stjörnu hótelum sem kalla á meiri fjárfestingar en þær framkvæmdir sem oft hefur verið farið í á landsbyggðinni. Við erum að gera okkur gildandi sem heilsársáfangastað og þá þarf að kosta til,“ segir Helga.