Háar fyrirgreiðslur Spkef til venslaðra

Útlán Sparisjóðsins í Keflavík (Spkef) til starfsmanna sinna í lok árs 2007 námu samtals 754 milljónum króna, þar af tæplega 374 milljónir í erlendri mynt. Frá þessu greinir í rannsóknarskýrslu um sparisjóðina. Hæsta útlán til starfsmanns á þessum tíma nam 73,5 milljónum króna.

Þegar Fjármálaeftirlitið tók yfir Spkef í apríl 2010 námu heildarútlán til starfsmanna 1.520 milljónum króna, þar af milljarð í erlendri mynt. Þeir tíu starfsmenn sem skulduðu mest hjá Spkef skulduðu samtals tæplega 1,1 milljarð króna eða 72 prósent af öllum lánum til starfsmanna.

Eitt stærsta lánamál stjórnarmanns sparisjóðsins varðar Þorstein Erlingsson, stjórnarformann sparisjóðsins í nokkur ár fyrir hrun. Í skýrslunni segir að félag tengd honum hafi notið „stórra fyrirgreiðslna hjá sparisjóðnum.“ Skuldbindingar félags Þorsteins námu 1,6 milljörðum króna í apríl 2010 á sama tíma og tryggingar fyrir skuldbindingum þess voru metnar á 280 milljónir.

Annað mál varðar Birgi Þór Runólfsson sem var bæði vara- og aðalmaður í stjórn frá 2007 til 2009, sambýliskonu hans og félög í þeirra eigu. Fyrirgreiðslur til þeirra komu til áður en hann varð stjórnarmaður. Þau fengu lán hjá sparisjóðnum í erlendum myntum að samtals að jafnvirði tæplega 300 milljónum króna til kaupa á stofnfjárbréfum. Flest lánin voru í erlendum myntum með veði í bréfunum.

Að auki skoðaði nefndin fyrirgreiðslur til tveggja aðila sem tengdir voru Geirmundi Kristinssyni sparisjóðsstjóra, en um er að ræða tvö börn hans. Þar var ekki gætt reglna sjóðsins við lánveitingar né var þeirra getið á skýrslum sjóðsins til FME. Annars vegar var um að ræða yfirdráttarheimild á reikningi upp á rúmar 50 milljónir króna til kaupa á stofnfjárbréfumm án greiðslumats og aðeins með veði í bréfunum sjálfum. Hins vegar yfirdrátt upp á 22 milljónir sem var endurfjármagnaður með láni í erlendri mynt að jafnvirði 25 milljóna. Samtals námu skuldbindingarnar tæpum 69 milljónum króna við yfirtöku Landsbankans á útlánasafni Spkef.