Jesús álíka vinsæll og Júdas

Þegar fjórar vikur eru liðnar af þeim sjö sem páskabjórinn verður seldur í verslunum ÁTVR, hefur salan á honum aukist um 28 prósent miðað við á sama tíma og í fyrra.

„Þetta er svipuð aukning og við höfum séð í sölu á jólabjór og þorrabjór. Þessi tímabundnu sérbjórar eru altaf að verða vinsælli,“ segir Einar S. Einarsson, framkvæmdastjóri sölu- og þjónustusviðs, aðspurður.

Eins og staðan er núna er Viking páskabjór söluhæstur og í öðru sæti er Páskakaldi frá Bruggsmiðjunni en hann var söluhæsti páskabjórinn í fyrra. Páskagull frá Ölgerðinni er í þriðja sæti en þessir þrír bjórar eru langvinsælastir í ár. Enn eru stórar helgar eftir hvað páskabjórsöluna varðar og því gætu sölutölurnar breyst.

Páska-ljósölið Jesús frá Borg seldist upp í verslunum ÁTVR á fyrstu tveimur vikunum, sem kemur kannski ekki á óvart enda kom bjórinn út í mjög takmörkuðu magni. Jesús naut þannig álíka mikilla vinsælda og Júdas, sem Borg sendi frá sér í fyrra. Sá bjór seldist upp á fyrstu tveimur til þremur vikunum.