Dómur hafnar lækkun skatta

Hafnarfjarðarbær þarf að greiða viðbótarskatt upp á 273 milljónir króna vegna hagnaðar af sölu hlutabréfa í Hitaveitu Suðurnesja fái að standa dómur Héraðsdóms Reykjavíkur frá sjöunda þessa mánaðar. Þá bætist líklega einnig við kostnaður.

Hafnarfjarðarbær stefndi ríkinu í febrúar í fyrra og vildi fá tekjuskattsstofn bæjarins fyrir gjaldaárið 2010 lækkaðan um tæpa 5,5 milljarða króna. Til vara krafðist bærinn þess að miðað yrði við gjaldárið 2009, en þá var tekjuskattshlutfallið tíu prósent, en ekki fimmtán prósent eins og árið eftir. Hvoru tveggja var hafnað í dómi héraðsdóms.

Guðrún Ágústa Guðmundsdóttir, bæjarstjóri Hafnarfjarðar, segir bæinn þegar hafa greitt tekjuskatt af sölunni miðað við tíu prósenta álagningu, með fyrirvara um mótmæli bæjarins. Miðað við fimmtán prósenta skatt hefði hins vegar átt að greiða 820 milljónir króna í skatt af söluhagnaðinum.

Afstöðu til mögulegrar áfrýjunar segir Guðrún verða tekna að lokinni kynningu og að fenginni ráðgjöf lögmanns bæjarins í málinu á næsta fundi bæjarráðs. Lögmaðurinn hafi ekki haft tök á að mæta á fund bæjarráðs í gær.