Forval á verslunar- og veitingarekstri

Stjórn Isavia hefur ákveðið að efna til forvals á verslunar- og veitingarekstri í brottfararsal Leifsstöðvar. Um leið verður ráðist í breytingar á brottfararsal flugstöðvarinnar og þjónustan endurskipulögð.

„Framboð verslana- og veitinga hefur mikil áhrif á ánægju farþega og heildarupplifun af flugvellinum. Endurhönnun brottfararsvæðisins mun taka mið af því að hlutfall erlendra ferðamanna er að aukast mikið. Íslensk náttúra og menning verða í forgrunni til að gera ferð farþega eftirminnilega og öðruvísi en á öðrum flugvöllum,“ segir Hlynur Sigurðsson, framkvæmdastjóri flugstöðvarinnar, í samtali við Markaðinn.

Í fyrra lögðu alls um 2,8 milljónir farþega leið sína um völlinn og spáð er 18 prósenta fjölgun á yfirstandandi ári. Þá er áætlað að farþegafjöldinn verði orðinn rúmar fimm milljónir árið 2020.

Forvalið mun eingöngu ná til sérverslana og veitingastaða en ekki vöruflokka Fríhafnarinnar, sem mun sem fyrr hafa með höndum sölu á áfengi, tóbaki, sælgæti, ilm- og snyrtivörum ásamt öðru.

„Við höfum sent út fréttatilkynningar erlendis og þegar er komið mikið af fyrirspurnum frá verslunum og veitingastöðum sem eru í rekstri á öðrum erlendum flugvöllum,“ segir Hlynur en getur þó ekki gefið upp hvaða aðilar það eru að svo stöddu.

Kynningarfundur vegna útboðsins verður haldinn í Hörpu 19. mars en þar verða forvalsgögn til sölu og kosta 15 þúsund krónur.