Cooori mun kenna yfir tíu erlend tungumál á netinu

Cooori er ungt sprotafyrirtæki sem sérhæfir sig í lausnum til að læra tungumál á netinu.

Félagið gaf út japönsku fyrir enskumælandi vorið 2012 sem þróunartungumál en er nú á leið í þrjár nýjar útgáfur á mjög stórum markaðssvæðum. Í fyrsta lagi ensku fyrir Japana, þar sem yfir 20 milljónir eru að læra, þá ensku fyrir Kóreumenn þar sem markaðurinn er yfir tíu milljónir og að lokum japönsku fyrir Kóreumenn en þar eru yfir fimm milljónir að læra tungumálið.

„Í kjölfarið erum við að gíra okkur upp í að fara í tíu tungumál í viðbót og sækja af fullum krafti á markaðinn og til þess þurfum við sterka bakhjarla og þá erum við að horfa á stóra erlenda fagfjárfesta eða sjóði,“ segir Þorsteinn G. Gunnarsson, stjórnarformaður Cooori, í samtali við Markaðinn.

Cooori er nú í viðræðum við Daiwa Securities sem Þorsteinn segir vera annað stærsta fyrirtækið í Japan. Þá eru einnig viðræður í gangi milli Cooori og NTT Docomo sem er stærsta fjarskiptafyrirtæki Japana og Benesse Group sem er stórt kennslu- og menntunarfélag þar í landi.

„Við erum með aðsetur bæði á Íslandi og í Tókýó og þá erum við með starfsmenn og aðstöðu til dæmis í Stokkhólmi og Paolo Alto og fleiri stöðum,“ segir Þorsteinn.