Biðlar til landans að skila sodastream-hylkjum

Kolsýruhylki sem Vífilfell hefur haft til sölu síðustu árin fást ekki í verslunum landsins þessa dagana og hafa því margir SodaStream-tækjaeigendur komið að tómum hillum í búðum undanfarið.

„Ástæðan fyrir vöntun er skortur á tómum hylkjum til áfyllingar. Því hvetur Vífilfell alla þá sem luma á tómum hylkjum að skila þeim inn svo hægt sé að fylla á þau,“ segir Stefán Magnússon, framkvæmdastjóri markaðssviðs Vífilfells.

Vegna lítils framboðs á hylkjum eru þau eingöngu fáanleg hjá Vífilfelli enda um of lítið framboð að ræða til að dreifa í margar verslanir. Það er þó til lítils fyrir sódavatnsunnendur að reyna að hamstra hylkin.

„Við biðjum neytendur að sýna okkur þolinmæði og höfum óskað eftir að fólk taki ekki of mörg hylki í einu þannig að sem flestir fái hylki.“

Stefán segir stefnt að því að kolsýruhylkin komist í eðlilega dreifinu öðrum hvorum megin við páska miðað við upplýsingar frá birgjum hér innanlands.