Álverið greiðir alla raforkuna en notar aðeins hluta hennar

Rio Tinto Alcan þarf að greiða Landsvirkjun fyrir nánast alla þá orku sem ný Búðarhálsstöð framleiðir þrátt fyrir að fyrirtækið geti einungis notað um 80 prósent af orkunni. Verðið er trúnaðarmál en orkusamningur fyrirtækjanna var undirritaður árið 2010 og gildir til ársins 2036.

Fyrirtækin komust að samkomulagi þegar unnið var að viðamiklum breytingum á álverinu í Straumsvík sem áttu að auka framleiðslugetu þess um tuttugu prósent. Í apríl á síðasta ári kom í ljós að framleiðslan yrði einungis aukin um átta prósent og orkuþörf fyrirtækisins því minni en upphaflega var gert ráð fyrir. Samningurinn mun að sögn Harðar Arnarsonar, forstjóra Landsvirkjunar, standa þangað til fyrirtækin semja um annað.

„Rio Tinto er skuldbundið til að taka við orku í samræmi við þann samning og Landsvirkjun að afhenda í samræmi við samninginn og honum hefur ekki verið breytt. Fyrirtækinu ber að greiða fyrir raforku hvort sem það notar hana eða ekki,“ segir Hörður.

Raforkan sem virkjanir Landsvirkjunar framleiða fer inn á dreifikerfi Landsnets og þaðan til viðskiptavina. Landsvirkjun tilkynnti í janúar um orkuskerðingu til stórnotenda sem gæti staðið til aprílloka. Skerðinguna má rekja til veðurfars en ákvörðunin hefur meðal annars haft áhrif á rekstur álversins í Straumsvík sem þurfti í kjölfarið að draga úr fyrirhugaðri framleiðsluaukningu.

„Það eru takmarkanir fyrir því hvernig við getum fært orku á milli landssvæða, það getur verið gott ástand á einum stað, slakt á öðrum stað. Við lentum í þessu síðastliðið vor, þó ekki hafi komið til skerðingar, þá var næstum farið í þær Austurlandi en á þeim tíma var til orka á Suðurlandi en hún komst ekki austur. Og það eru ekki ósvipaðar aðstæður núna, núna er staðan öfug, það er enn til orka á Austurlandi,“ segir Hörður og bætir því við að það sé mjög mikilvægt fyrir orkufyrirtækin að dreifikerfi Landsnets verði eflt.

„Það bætir nýtinguna og eykur afhendingaröryggið. En þetta hefur því miður gengið mjög hægt,“ segir Hörður og bendir á að Landsnet hefur ítrekað reynt að ná fram breytingum sem hafa stoppað í skipulags- eða leyfisferlum.

„En við vonum að rofi eitthvað til þar en Landsnet hefur ekki enn fengið nein leyfi,“ segir Hörður.