Íbúðalánasjóður og bankar eiga á fjórða þúsund íbúðir

Íbúðalánasjóður, stærstu bankar og dótturfélög eiga 3.406 fasteignir. Þetta kemur fram í samantekt sem spyr.is hefur unnið.

Langflestar eignirnar eru í eigu Íbúðalánasjóðs og dótturfélags hans, Kletts, 2.634. Íbúðalánasjóður átti 2.117 íbúðir í lok janúar, þar af stóðu 197 þeirra auðar.

Klettur leigufélag er með 517 íbúðir á sínum snærum og eru þær allar í útleigu.

Af íbúðunum sem stóðu auðar voru 20 á höfuðborgarsvæðinu, 102 á Suðurnesjum og 37 á Vesturlandi.

Arion banki og dótturfélagið Landey eiga 236 fasteignir, af þeim flokkast 141 sem íbúðarhúsnæði og þar af standa 42 eignir auðar.

Landey á eina eign sem er íbúðarhæf en stendur auð og bíður þess að verða seld. Landey er auk þess með 16 eignir sem eru á byggingarstigi.

Landsbankinn og dótturfélagið Hömlur áttu 244 íbúðir um áramót. 116 stóðu tómar, í leigu voru 76 og 52 voru á byggingarstigi.

Íslandsbanki og dótturfélag hans, Miðengi, eiga 275 íbúðir en af þeim eru 126 í útleigu. Bankinn áætlar að 159 eignir standi auðar, séu á byggingarstigi, teljist ekki íbúðarhæfar eða séu á sölu.

Á heimasíðu spyr.is segir að af þessum 3.406 eignum megi gera ráð fyrir að á milli 400 og 500 eiginir standi auðar. Langflestar þeirra hafi áður verið í eigu einstaklinga.