Strætó gerir hótelum tilboð um farmiðakort

Framhald verður á tilraunaverkefni þar sem hótelgestum gefst kostur á að nýta sér þjónustu Strætó bs. Í mars í fyrra sömdu Hilton Reykjavík Nordica og Reykjavík Natura við Strætó um kaup á farmiðakortum fyrir gesti sína.

„Við lítum á þetta sem hluta af þjónustunni,“ segir Ingólfur Haraldsson, hótelstjóri á Hilton. Um leið lagði hótelið af skutlþjónustu. Nú segir Ingólfur þjónustuna aukna, enda hafi hótelið ekki getað boðið upp á þá tíðni ferða sem Strætó geri. „Og gestir nýta sér þetta töluvert vel.“

Ingólfur segir kostnað hótelsins vegna ferða gesta líkast til svipaðan og áður. „En þetta er líka hluti af því að vinna eftir grænum stöðlum og vistvænum. Þar leika almenningssamgöngur hlutverk.“ Um leið batni nýting strætisvagna utan háannaferðatíma heimafólks.

Heilt yfir segir Ingólfur verkefnið hafa gefist vel, enda ferðafólk utan úr heimi alvant því að nýta almenningssamgöngur. Eina umkvörtunarefnið sé að strætó byrji ekki að ganga fyrr en á hádegi á sunnudögum. 

„Og það held ég að hljóti að vera einsdæmi í almenningssamgöngum í heiminum,“ segir hann. „En þetta snýr náttúrlega að fleirum en gestum okkar, svo sem fólki sem mæta þarf í vinnu á sunnudögum.“

Kolbeinn Óttarsson Proppé, upplýsingafulltrúi Strætó, segir tilraunina hafa mælst vel fyrir. „Með vorinu ætlum við í aukna kynningu á þessu og fá fleiri hótel með,“ segir hann.