Verðbólga á leið undir markmið Seðlabankans

Gangi eftir spá greiningadeildar Arion banka verður 12 mánaða verðbólga í þessum mánuði undir verðbólgumarkmiði Seðlabanka Íslands. Yrði það í fyrsta sinn frá í mars 2011 sem það gerist.

Greiningardeildin spáir 0,7 prósenta hækkun á vísitöluneysluverðs í mánuðinum. „Þar vegur þyngst að útsöluáhrif munu ganga til baka og hafa 0,5 prósenta áhrif til hækkunar á vísitöluna,“ segir í spánni. Ársverðbólga myndi þá mælast 2,2 prósent samanborið við 3,1 prósent í janúar. 

„Sú mikla lækkun sem verður á árstakti verðbólgunnar skýrist af þeirri miklu hækkun sem kom fram í febrúar í fyrra en þá hækkaði vísitalan um 1,64 prósent,“ segir í spá greiningardeildar bankans.

„Sú mæling dettur út og í stað áætlum við hóflegri hækkun sem nemur 0,7 prósenta hækkun eins og áður var nefnt.“

Bankinn gerir svo ráð fyrir 0,7 prósenta hækkun til viðbótar í mars, 0,4 prósentum í apríl og 0,3 prósentum í maí. „Spáin gerir því ráð fyrir að verðbólgan verði innan þolmarka verðbólguviðmiðs Seðlabankans (2,5 prósent verðbólga +/- 1,5 prósentur) næstu mánuði.