Hoen fékk hundruð milljóna

Í ársuppgjöri fyrirtækisins Marels fyrir árið 2013 kemur fram að tvær milljónir evra, eða um 314 milljónir króna, hafi farið í breyttar stjórnunarstöður hjá fyrirtækinu.

Árni Oddur Þórðarson var seint á síðasta ári ráðinn forstjóri Marels í staðinn fyrir Hollendinginn Theo Hoen og fór stærstur hluti upphæðarinnar í starfslok hans. Hoen hafði unnið hjá félaginu í 28 ár og endurspeglar það starfslokin, að sögn Ásthildar Otharsdóttur, stjórnarformanns Marels. Hoen hafði starfað sem forstjóri frá árinu 2009.

Spurð nánar út í þessar 314 milljónir króna, segir Ásthildur starfskjarastefnu Marels vera mjög skýra. „Fyrirtækið gerir ekki sérstaka starfslokasamninga en að sjálfsögðu fylgjum við þeim lögum og reglum sem gilda í hverju landi fyrir sig,“ segir hún en Marel starfar í yfir fjörutíu löndum með um fjögur þúsund starfsmenn.

„Í sumum löndum þar sem við störfum eru réttindi starfsmanna talsvert umfangsmeiri en við þekkjum héðan. Í Hollandi er það þumalputtaregla að fólk ávinni sér einn mánuð fyrir hvert ár sem það starfar. Svo á það uppsafnað frí og annað slíkt. Varðandi æðstu stjórnendur okkar er einnig oft samkeppnisklásúla,“ segir Ásthildur og bætir við að Marel styðjist við starfskjaraupplýsingar frá alþjóðlega ráðgjafafyrirtækinu Hay Group.