Samstarfinu haldið áfram

Nýsköpunar- og sprotafyrirtækið BioPol ehf. á Skagaströnd og Háskólinn á Akureyri, sem hafa starfað saman í sex ár við rannsóknir á sjávarlíftækni, hafa skrifað undir áframhaldandi samstarfssamning.

Velta sameiginlegra verkefna þeirra hefur verið yfir tíu milljónir króna á ári. BioPol hefur unnið að verkefnum sem meðal annars hafa miðað að því að kortleggja vannýtt tækifæri til verðmætasköpunar innan íslensks sjávarútvegs.

Háskólinn á Akureyri hefur boðið upp á meistaranám í sjávarútvegs- og auðlindafræðum. Kennslan hefur farið fram í samstarfi við innlend sjávarútvegsfyrirtæki og fyrirtæki í tengdum greinum, þar á meðal BioPol.