Gróði Icelandair Group jókst milli ára

Hagnaður Icelandair Group jókst um 27,4 prósent milli áranna 2012 og 2013 að því er fram kemur í tilkynningu til Kauphallar.

Hagnaður síðasta árs nam 56,4 milljónum Bandaríkjadala, eða sem svarar rúmum 6,5 milljörðum króna. Árinu áður hagnaðist félagið um tæplega 44,3 milljónir dala, eða um 5,1 milljarð króna. Fram kemur að tekjur félagsins hafi aukist um 13,8 prósent á milli ára.

Stjórn félagsins leggur til við hluthafafund að greidur verði út arður til hluthafa að upphæð 2.150 milljóna króna, en það jafngildi 43 aurum á hlut.

Í tilkynningunni er haft eftir Björgólfi Jóhannssyni, forstjóra félagsins, að félagið hafi staðið sig vel á síðsta ári og umtalsvert betur en spáð hafði verið í upphafi árs.

„Hagnaður fyrir skatta nam 71,0 milljón Bandaríkjadala og jókst um 13,6 milljónir dala milli ára.“ Líkt og fyrri ár hafi innri vöxtur einkennt starfsemina í fyrra, en það samrýmist stefnu félagsins.

„Flutningsgeta í leiðakerfi okkar jókst um 16 prósent frá fyrra ári og farþegum fjölgaði um 12 prósent,“ er haft eftir Björgólfi. Stærsti markaður félagsins sé millilandaflug á milli Evrópu og Norður-Ameríku, sem hafi verið undirliggjandi afl í vexti félagsins síðustu ár.

„Ferðamarkaðurinn á Íslandi hefur einnig vaxið mjög og aukin eftirspurn eftir þjónustu við ferðafólk til Íslands. Samhliða þessum vexti hafa félög innan samstæðu Icelandair Gropu fundið tækifæri til arðvænlegs vaxtar.“