Sýningar Mið-Íslands mala gull

Um sex þúsund miðar hafa selst á sýningar uppistandshópsins Mið-Ísland í Þjóðleikhúskjallaranum frá því miðasala hófst í byrjun janúar. Miðasalan hefur skilað á bilinu þrettán til átján milljónum króna samkvæmt miðaverði Miði.is. Fimmmenningarnir sem mynda hópinn hafa þó ekki enn slegið eigið met frá því í fyrra þegar um tíu þúsund gestir sáu sýningar þeirra.

„Þetta er ágætis upphæð en við vorum með 38 sýningar í fyrra og það stefnir í hátt í fimmtíu núna ef það heldur áfram að ganga svona vel. En maður er ekkert að fara að kaupa sér nýjan bíl fyrir þetta því við erum með fólk í vinnu og svo deilist þetta í fimm hluta,“ segir Halldór Halldórsson, betur þekktur sem Dóri DNA.

Nýhafin sýningaröð hópsins er sú þriðja í röðinni og Mið-Ísland fagnar nú fimm ára starfsafmæli.

„Við byrjuðum á Prikinu og þá var frítt inn og fyrir tveimur árum fórum við yfir í Þjóðleikhúskjallarann og síðan á stóra svið leikhússins. Í fyrra færðum við okkur alfarið niður í kjallarann af því húsnæðið er einstaklega hentugt.“

Dóri segir að sýningarnar muni að öllum líkindum enda í mars því honum skilst að Þjóðleikhúskjallarinn sé bókaður eftir það.

„Í fyrra vorum við farnir að teygja okkur fram í apríl. En við erum auðvitað rosalega þakklátir fyrir viðtökurnar og þetta er alveg það skemmtilegasta sem maður gerir að fá að grínast í þessum kjallara þegar maður er að skemmta fyrir fólk sem er þangað komið til að sjá grín.“

Fimmmenningarnir sinna allir öðrum verkefnum á meðan á sýningunum stendur. Halldór er sjálfur í pistlaskrifum og að vinna í leikhúsi.

„Þannig að þetta vex og vex og menn eru svolítið að uppskera eins og þeir sáðu. Það fer mikil vinna í þetta, maður er alltaf að meitla efnið. Sumir vilja meina að grínistaefni sé eins og naglasúpa, þú setur nagla í og eyðir svo vetrinum í að bæta hráefnum út í hana og þú veist ekki hvernig hún varð til en hún er samt djöfulli bragðgóð.“