Nýuppgert tengivirki bætir hag bræðslnanna

Landsnet mætir aukinni eftirspurn fiskimjölsverksmiðja á Austurlandi með endurbótum á flutningskerfi raforku í fjórðungnum.

Í gær var formlega tekið í notkun, að loknum endurbótum og stækkun, tengivirki Landsnets á Stuðlum við Reyðarfjörð. Heildarkostnaður við verkefnið er sagður um 400 milljónir króna.

„Samhliða hefur Stuðlalína 1 verið spennuhækkuð,“ segir í tilkynningu Landsnets, en framkvæmdirnar eru sagðar fyrsti áfanginn í aðgerðaráætlun Landsnets til að auka flutningsgetu og áreiðanleika svæðisflutningakerfisins á Austurlandi.

„Stækkun tengivirkisins á Stuðlum er fyrsti áfangi verksins í þeim áformum Landsnets að spennuhækka hringtenginguna Hryggstekkur-Stuðlar-Eskifjörður-Eyvindará.“

Fram kemur að fiskimjölsverksmiðjur eystra hafi í auknum mæli skipt út olíukötlum fyrir rafskautakatla og geti nú nýtt innlenda og umhverfisvæna orku í stað olíu.

Landsnet segir að þótt svæðisflutninganetið á Austfjörðum sé bætt með þessum hætti búi meginflutningskerfið á svæðinu áfram við takmarkanir, þar sem byggðalínan sé fulllestuð.