Spá 0,7 prósentustiga hjöðnun verðbólgu

Verðbólga í janúar fer úr 4,2 prósentum í 3,5 prósent gangi eftir ný spá Greiningar Íslandsbanka. Hjöðnunin nemur 0,7 prósentustigum.

Í Morgunkorni Greiningar í gær er gert ráð fyrir því að vísitala neysluverðs lækki um 0,4 prósent milli desember og janúar.

Þá eru sterkari króna og tiltölulega hófleg hækkun launa í nýgerðum kjarasamningum sögð munu hafa góð áhrif á verðbólguþróunina næstu mánuði.

„Þannig munu verslanir væntanlega kaupa inn nýjan varning á hagstæðara gengi eftir útsölur en útsöluvarningurinn var upphaflega keyptur inn á, og útsölulok hafa því ekki jafn sterk áhrif í spá okkar eins og verið hefur síðustu ár,“ segir í umfjöllun Greiningar.

„Einnig síast styrking krónunnar frá nóvemberbyrjun jafnt og þétt inn í verð vara með hægari veltuhraða á næstu mánuðum.“

Í spánni er gert ráð fyrir að verðbólga fari í 2,6 prósent í febrúar, en taki svo að stíga að nýju og verði komin í 3,1 prósent í árslok.

„Þetta eru töluvert bjartari verðbólguhorfur en við höfðum áður gert ráð fyrir á árinu 2014, og má segja að verðbólgumarkmið Seðlabankans verði innan seilingar allt árið.“

Í kjölfarið er gert ráð fyrir að verðbólga aukist að nýju og mælist 3,3 prósent yfir árið 2015.

„Aukinn verðbólguþrýstingur mun væntanlega koma til af því að laun hækka hraðar eftir því sem slakinn hverfur úr hagkerfinu, íbúðaverð heldur áfram að hækka og krónan mun trúlega gefa eitthvað eftir á komandi misserum.“

Spánna má nálgar hér á vef Íslandsbanka.