Ríkið fær helmingi lægri skatttekjur fyrir hvern ferðamann

Skatttekjur af hverjum ferðamanni lækka umtalsvert á milli ára. Þetta kemur fram í svari fjármála- og efnahagsráðherra við fyrirspurn Oddnýjar G. Harðardóttur um tekjur ríkissjóðs af hverjum ferðamanni.

Tæplega 300 þúsund ferðamenn komu hingað til lands árið 2002 samanborið við 670 þúsund árið 2013 og voru beinar skatttekjur af hverjum ferðamanni á verðlagi ársins 2013 helmingi lægri árið 2012 heldur en árið 2002.

Árið 2002 voru uppreiknaðar skatttekjur tæplega 60 þúsund á hvern ferðamann samanborið við rétt rúmlega 30 þúsund árið 2012. Oddný telur að skoða þurfi rekstrarumhverfi ferðaþjónustu hér á landi með hliðsjón af þessum svörum.

„Það er rík ástæða til þess að skoða rekstrarumhverfi ferðaþjónustunnar, miðað við svör ráðherra. Þegar við erum með atvinnugrein sem er að vaxa svona hratt, þá verðum við að skoða hvort við viljum að hún vaxi í þessu umhverfi,“ segir Oddný. 

Í svari ráðuneytisins kemur fram að leiða megi að því sterkar líkur að mikil fjölgun ferðamanna feli í sér breytingar á samsetningu hópsins. Ýmsar kannanir bendi til þess að ferðamenn eyði lægri upphæðum hér á landi nú en þeir gerðu áður. Þá hafi gistimöguleikum hérlendis til dæmis fjölgað verulega, sérstaklega í ódýrari kantinum, sem væntanlega eigi sinn þátt í að skapa grundvöll fyrir þeirri fjölgun sem orðið hefur. Lækkun virðisaukaskatts 1. mars 2007 úr 14% í 7%, á matvöru, veitinga- og gistiþjónustu, skýri væntanlega einnig hluta af þessari þróun þar sem þau viðskipti veiti ekki rétt til endurgreiðslu virðisaukaskatts eins og kaup á varanlegum varningi.