Veiða ferðamenn á heimaslóðum

Pipar\Travel nefnist ný deild innan auglýsingastofunnar Pipar\TBWA sem nýverið hóf starfsemi eftir nokkurn undirbúningstíma. „Við höfum verið að kortleggja Pipar\Travel í nokkra mánuði og undirbúa okkur vel,“ segir Unnar Bergþórsson, verkefnastjóri Pipar\Travel.

„Pipar\TBWA hefur í gegnum tíðina unnið mikið fyrir ferðaþjónustufyrirtæki og fundið fyrir aukinni eftirspurn frá þessum geira. Við vildum bæta þjónustuna við fyrirtækin sem við störfum fyrir ásamt öðrum nýjum og fundum fyrir mikilli þörf á sérstakri travel-deild hjá okkur.“

Ráðinn vegna sérþekkingar

Unnar var ráðinn til Pipars til þess að sinna \Travel-hlutanum sérstaklega. Hann er með BSc-menntun í viðskiptafræði og býr yfir mikilli þekkingu á ferðaþjónustugeiranum. „Ég er uppalinn á ferðaþjónustustaðnum Húsafelli og starfaði þar seinast sem framkvæmdastjóri rekstrarsviðs,“ segir hann.

Unnar segir að merkja hafi mátt mikla eftirspurn eftir sérhæfðri markaðsþjónustu fyrir ferðaþjónustufyrirtæki. „Fram að þessu hefur hefðbundin þjónusta auglýsingastofa ekki hentað ferðaþjónustugeiranum sérlega vel, þar sem vörur ferðaþjónustunnar eru ólíkar vörum annara viðskiptavina,“ segir hann og bendir á að þarfir og aðstæður ferðaþjónustufyrirtækja séu aðrar og þau hafi yfirleitt úr minna markaðsfé að spila en fyrirtækin sem auglýsingastofur vinni mest fyrir.

„Þess vegna er mikilvægt að straumlínulaga þjónustuna með stuttum boðleiðum og einfaldri, áhrifaríkri markaðssetningu. Með því er hægt að bjóða upp á arðbærar lausnir í markaðsþjónustu fyrir ferðaþjónustufyrirtæki.“

Eins bendir Unnar á að önnur lögmál gildi þegar ná eigi til ferðamanna. Þeir séu enda gjarnir á að bóka gistingu, afþreyingu og borð á veitingastaði áður en þeir koma til landsins. „Við viljum veita fyrirtækjum þær lausnir og þjónustu sem þarf til þess að ferðamaðurinn kaupi þeirra þjónustu áður en hann kemur til landsins. Það er svo gríðarlega mikil endurnýjun á viðskiptavinum ferðaþjónustufyrirtækja frá öllum heimshornum.“

Pipar\Travel nýtir að sögn Unnars allar stoðdeildir Pipars\TBWA til að sækja þá sérfræðiþekkingu sem hentar hverju sinni. Deildin njóti því liðsinnis 45 sérfræðinga. Þá séu samfélagsmiðlarnir nú eitt áhrifamesta markaðstól ferðaþjónustunnar. „Við nýtum öfluga og sérhæfða deild Pipars\TBWA í markaðssetningu á samfélagsmiðlum,“ segir hann.