Auktu líkurnar á sigri í steinn, blað og skæri

Leikurinn „steinn, blað eða skæri“ hefur í gegnum árin verið notaður til að útkljá mál og taka ákvarðanir. Ný rannsókn sýnir að árangur í leiknum byggir ekki aðeins á tilviljun heldur er hægt að hafa áhrif á gengi sitt í leiknum. NPR fjallar um málið.

Stærðfræðingar við Zheijang háskólann í Kína tóku til skoðunar lögmálið að þátttakendur velji einn af möguleikunum þremur af handahófi. 360 nemendur tóku þátt í rannsókninni og fengu þeir greitt fyrir að ná árangri í leiknum. Þannig fengu þeir hvatningu til að standa sig vel.

Að leiknum loknum kom í ljós að svörin dreifðu sér nokkuð jafnt, þ.e. hver aðgerð fyrir sig (steinn, blað eða skæri) voru notuð u.þ.b. jafn oft. Því var reiknað með. Hins vegar kom fleira áhugavert í ljós.

Svo virðist sem þeir sem vinni sigur í einvígi í leiknum, t.d. með því að nota skæri gegn blaði eða blað gegn steini voru líklegri til þess að halda sig við sömu formúlu. Þeir sem töpuðu voru hins vegar líklegri til þess að breyta.

Nú er að sjá hvort þessar upplýsingar reynist lesendum Vísis hjálplegar næst þegar þeir spila „stein, blað eða skæri“.