Keahótel kaupa Hótel Gíg

Keahótel ehf. hefur keypt fasteignina Hótel Gíg við Mývatn en félagið hefur rekið þar hótel- og veitingarekstur síðan árið 2002. Samkomulag náðist við félagið KHG European Hospitality Partners sem átti hæsta boð í eignina á uppboði sýslumannsins á Húsavík 11. febrúar síðastliðinn.

Hótel Gígur er 37 herbergja hótel með veitingasal en húsið hýsti áður Skútustaðaskóla.

Páll L. Sigurjónsson, framkvæmdastjóri Keahótela ehf. segir þetta fagnaðarefni sem þýði að hótelið geti staðið við skuldbindingar  við viðskiptavini sína í sumar. 

„Við hjá Keahótelum erum geysilega ánægð með þessi kaup. Þetta þýðir að við getum haldið áfram okkar farsæla starfi við Mývatn. Reksturinn hefur gengið mjög vel síðastliðin ár og bókunarstaðan framundan er mjög góð. Með þessum kaupum getum við staðið við áætlanir okkar og hugað að frekari uppbyggingu“.

Auk Hótel Gígs reka Keahótel ehf. fimm hótel; Hótel Kea, Hótel Norðurland á Akureyri, Hótel Borg, Hótel Björk og Reykjavik Lights í Reykjavík.

Mikill vöxtur

Mikið er framundan hjá Keahótelum ehf. á næstunni því að félagið er að bæta við sig tveimur nýjum hótelum.

Apotek Hotel mun opna síðla sumars 2014 og nýtt 100 herbergja hótel á Hverfisgötu 102 mun opna vorið 2015. Auk þess eru nýlega hafnar framkvæmdir á stækkun Hótel Borgar um 43 herbergi.

Keahótel ehf. fékk nýverið viðurkenningu Creditinfo sem framúrskarandi fyrirtæki en einungis 2% íslenskra fyrirtækja náðu þeim skilyrðum sem sett eru fyrir viðurkenningunni. Þetta er þriðja árið í röð sem Keahótel ehf. hljóta þessa viðurkenningu.