Seðlabankinn greiddi málskostnað Más gegn bankanum

Seðlabankinn greiddi málskostnað Más Guðmundssonar í máli hans gegn bankanum. 

Þetta staðfestir Lára V. Júlíusdóttir, hæstaréttarlögmaður í yfirlýsingu sem hún sendir frá sér. 

Yfirlýsingin kemur í kjölfar frétta þess efnis að Seðlabanki Íslands hafi greitt málskostnað Más Guðmundsonar sem Vísir greindi frá fyrr í dag.

Lára var formaður bankaráðs Seðlabanka Íslands á þessum tíma en í yfirlýsingunni segir hún að bankaráðið hafði beðið Andra Árnason hrl. um lögfræðilega álitsgerð um réttarstöðu seðlabankastjóra. 



Leitaði hann svara við því hvort hægt væri að lækka laun seðlabankastjóra á skipunartíma og frá hvaða tímapunkti ætti að greiða seðlabankastjóra laun samkvæmt ákvörðun kjararáðs.

„Niðurstaða lögfræðiálitsins var sú að ekki væri hægt að breyta launum seðlabankastjóra á skipunartíma og því kæmi úrskurður kjararáðs ekki til framkvæmda fyrr en að honum liðnum.  Tilraunir Más Guðmundssonar til að fá kjararáð til að staðfesta niðurstöðu álitsins reyndust árangurslausar.

Eina leiðin til að fá úr þessu skorið var fyrir dómstólum. Það var ekki síður hagsmunamál Seðlabankans  sjálfs að fá úr þessu skorið en þess einstaklings sem á hverjum tíma gegnir embætti seðlabankastjóra. Í ljósi þessa var sú ákvörðun tekin að bankinn stæði straum af öllum kostnaði vegna málsins,“ segir í yfirlýsingunni.

Lára bætir við að bankaráðið hafi á hverjum tíma verið upplýst um stöðu þessa dómsmáls og hafði öll tök á að fylgjast með málinu.



„En ég sem formaður ráðsins hafði meginumsjón með rekstri málsins fyrir hönd bankans og átti í samskiptum við þá sem önnuðust málareksturinn eftir þörfum.“