HB Grandi á aðalmarkað í apríl

HB Grandi snýr aftur inn á aðalmarkað Kauphallar Íslands í apríl og verður þar með fyrsta sjávarútvegsfyrirtækið til að snúa aftur á markað. Forstjóri Kauphallarinnar fagnar endurkomu sjávarútvegsfyrirtækja á markað.

Liðin eru 11 ár síðan sjávarútvegsfyrirtæki var nýskráð í Kauphöll Íslands. Blómlegur markaður var um hlutabréf í sjávarútvegfyrirtækjum í kringum aldamótin en þá voru alls 19 sjávarútvegsfyrirtæki á markaði.

„Þetta þykja nokkur tíðindi. Það hefur ekki verið sjávarútvegsfyrirtæki á aðalmarkaði í allmörg ár. HB Grandi er það fyrirtæki sem er með stærstu aflahluteild í íslenskum sjávarátvegi,“ segir Vilhjálmur Vilhjálmsson, forstjóri HB Granda.

Arion-banki selur stóran hlut

Um þriðjungshlutur í fyrirtækinu verður boðinn á markað. Þrír af fimm stærstu hluthöfum ætla að selja sinn hlut. Arion Banki mun setja um 20-25% af sínum eignarhlut á markað.

„Helsta ástæðan fyrir því að við förum á markað er til að gefa almenningi og almennum fjárfestum tækifæri til að fjárfesta og eignast hlut í félaginu,“ segir Vilhjálmur.

Almenningseign styrkir greinina

Fyrirtæki á Íslandi hafa verið að snúa aftur á markað eftir hrun. Skömmu eftir aldamót voru 75 fyrirtæki á markaði en eru 17 í dag. Forstjóri Kauphallarinnar fagnar endurkomu sjávarútvegsfyrirtækja á markað.

„Það er mikilvægt að fyrirtæki í undirstöðugrein þjóðarbúsins komi inn á markað og að það verði í almenningseign,“ segir Páll Harðarson, forstjóri NASDAQ OMX Iceland.

„Það er fullt tilefni til þess að fá fleiri sjávarútvegsfyrirtæki á markað. Það hefði mikla þýðingu fyrir greinina og jafnframt fælust í því töluverð tækifæri fyrir markaðinn. Það getur styrkt atvinnugreinina að almenningur komi að henni með auknum hætti.“