Sér fram á að ýsan klárist

Fiskídag, landsátak sem Matís stendur fyrir og er ætlað að gera neytendur meðvitaðri um mikilvægi fiskneyslu, var til umræðu í Bítinu í morgun.

Rætt var við Steingrím Ólason, fisksala á Sundlaugavegi um núverandi neyslu landans á sjávarfangi sem Steingrímur telur að sé smám saman að breytast.

Neytendur séu að yngjast og að fleiri fisktegundir séu að rata á borð landsmanna.

Aðspurður um þráfelldar vinsældir ýsunnar sagði Steingrímur að þær ættu sér sögulegar rætur. Lengi vel hafi Íslendingar neyðst til að gæða sér á ýsunni vegna þess að hún seldist ekki erlendis en þær neysluvenjur væru óðum að umturnast.

„Fólk er bæði að taka við sér og fara í aðrar tegundir og kvótinn á ýsu er orðinn það lítill. Núna er búið um 70-80% af kvótanum, nýtt kvótaár hefst í september og ég sé ekki að til verða ýsa út árið,“ sagði Steingrímur.

Einnig er eftirspurnin eftir ýsu erlendis, til að mynda í Bretland og Bandaríkjunum, orðin mikil og því þurfi landinn líklega að færa sig yfir í annað sjávarfang.

Þorsteinn Sigurðsson hjá Hafrannsóknarstofnun segir í viðtali við Vísi að vandamálið snúi öðruvísi að vísindamönnum stofnunarinnar en fisksölum og sjómönnum landsins.

Að mati Þorsteins liggur vandinn ekki í því að heildaraflamark ýsu, 38.000 tonn á fiskveiðiárinu, sé of lítið heldur að yngri árgangar ýsunnar séu of litlir. Smáýsan sjáist því varla þó að nóg sé til af fullorðinni ýsu.

Einnig slysast mikið af ýsu með öðrum afla og hefur Bárður Guðmundsson, formaður Samtaka smærri útgerða, lýst áhyggjum sínum af þróuninni.

„Ef við veiðum meira í dag þá neyðumst við einfaldlega til að veiða minna í framtíðinni,“ segir Þorsteinn og bætir við að rannsakendur þurfi að hugsa langt fram í tímann í áætlunum sínum.



„En ýsan á markaði í dag er stór og alveg rosalega falleg,“ bætir Þorsteinn við kíminn og hvetur hann alla til að næla sér í flak.