Erum enn bara hálfdrættingar

Umfang kauphallarviðskipta er hér enn lítið í samanburði við nágrannaþjóðirnar. Þetta kom fram í máli Höskuldar H. Ólafssonar, bankastjóra Arion banka, við upphaf Kauphallardaga í bankanum í gær. Þeir eru haldnir í fjórða sinn og lýkur í dag.

„Á síðasta ári var meðalvelta hlutabréfa í Kauphöllinni á dag nærri einn milljarður króna, sem samsvarar þreföldun frá árinu á undan. Markaðsvirði skráðra félaga er svo orðið um þriðjungur af vergri landsframleiðslu þannig að markaðurinn er nálægt því hlutfallslega að vera hálfdrættingur á við það sem gerist í löndunum sem við berum okkur helst saman við,“ sagði hann.

Að þessu sinni kynna 17 félög starfsemi sína á Kaupahallardögum Arion banka, bæði skráð félög og önnur sem stefna á skráningu.