Sjöföld umframeftirspurn í útboði Sjóvá

Heildareftirspurn í hlutafjárútboði Sjóvár var 35,7 milljarðar króna og því rúmlega sjöfalt meiri en 4,7 milljarða söluandvirði þeirra hluta sem boðnir voru út.

Heildarstærð útboðsins sem lauk á mánudag nemur 23 prósentum af útgefnu hlutafé í Sjóvá. Um 7.800 áskriftir bárust og af þeim tilheyrðu 7.600 þátttakendum sem lögðu fram tilboð frá eitt hundrað þúsund krónum og upp í tíu milljónir. Góð þátttaka leiddi til þess að hámarksúthlutun til þeirra, það er fjárfesta sem sendu áskriftir í tilboðsbók A, var 227 þúsund krónur á hverja áskrift. 

Útboðsgengi í tilboðsbók A er 11,9 krónur á hlut og tíu prósent hluta í félaginu verða seldir á því verði. Í tilboðsbók B var tekið við tilboðum yfir tíu milljónum króna og þar bárust 232 áskriftir að fjárhæð 15,3 milljarðar. Útboðsgengi tilboðsbókar A er 13,51 króna á hlut. 

Hermann Björnsson, forstjóri Sjóvár, segir í tilkynningu félagsins um niðurstöður það ánægjulegt hversu fjölmennur hópur almennra fjárfesta hefði tekið þátt.

„Mikil þátttaka í útboðinu er okkur hjá Sjóvá mikið gleðiefni og í takti við þann meðbyr og áhuga sem við höfum fundið í aðdraganda þess," segir Hermann.