Lög um virðisaukaskatt fólu í sér ólögmæta ríkisaðstoð

Breytingar sem gerðar voru á lögum hér á landi um virðisaukaskatt er vörðuðu viðskiptavini gagnavera fólu í sér ólögmæta ríkisaðstoð. Það er niðurstaða rannsóknar Eftirlitsstofnunar EFTA (ESA) sem hófst í janúar í fyrra en lögin voru í gildi frá 1. maí 2011 til 13. mars 2013.

Skömmu eftir að rannsóknin hófst var lögunum breytt og í þeim felld úr gildi þau ákvæði sem ESA hafði efasemdir um. Í kjölfar niðurstöðu ESA er íslenskum stjórnvöldum gert að endurheimta þá ríkisaðstoð sem veitt var á fyrrnefndu tímabili.

„Þessi ákvörðun sýnir hve mikilvægt er að EFTA ríkin leiti eftir samþykki ESA áður en aðgerðum sem kunna að fela í sér ríkisaðstoð er hrundið í framkvæmd. ESA mun ávallt fara fram á að ríki endurheimti ólögmæta aðstoð sem ekki hefur verið fyrirfram samþykkt af hálfu stofnunarinnar,“ segir Oda Helen Sletnes, forseti ESA.

Niðurstaða ESA var að sá hluti lagabreytingarinnar sem sneri að rafrænt afhentri þjónustu gagnavera til kaupenda sem búsettir voru erlendis, hafi ekki falið í sér ríkisaðstoð enda samrýmdist breytingin þeirri meginreglu að virðisaukaskattur sé ekki lagður á vörur og þjónustu sem seld er úr landi. Hins vegar taldi ESA nauðsynlegt að rannsaka hvort hinar lagabreytingarnar tvær fælu í sér ríkisaðstoð, og ef svo væri hvort aðstoðin samrýmdist EES samningnum.

Nánar má lesa um ákvörðun ESA hér.