Rætt um skapandi greinar á Austurlandi

Vinnustofa Nýsköpunar- og þróunarsviðs Austurbrúar, um stefnumótun skapandi greina verður haldin í Menntaskólanum á Egilsstöðum næstkomandi þriðjudag. Fjallað verður um þau verkfæri og afurðir sem þorpsverkefnið MAKE by Þorpið hefur gefið af sér og þróunarvinna verkefnisins kynnt.

Einnig verður kynning á SAM félaginu, sem er grasrótarsamtök skapandi fólks á Austurlandi. Þetta kemur fram í tilkynningu frá Austurbrú.

MAKE by Þorpið er þriggja ára gamalt verkefni sem hefur meðal annars það markmið að auka fagmennsku á sviði vöruhönnunar og listhandverks á Austurlandi. Þá er verkefninu ætlað að þróa leiðir til að markaðssetja vörurnar í tengslum við ímynd landshlutans sem áfangastaðir fyrir skapandi fólk.

„Mikil áhersla er lögð á að hámarka virði staðbundinna hráefna og nýta auðlindir í formi hráefna og mannauð tækja og tóla. MAKE by Þorpið vinnur markvisst með staðbundin hráefni og aðstæður en leggur mikla áherslu á að opna gluggann út í heim og vinna í alþjóðlegu tengslaneti,“ segir í tilkynningunni.

Vinnustofan hefst klukkan 16 og er öllum opin.