Dalvíkingar bjóða upp á hvalaskoðun allt árið

Í fyrsta sinn á Norðurlandi er nú boðið upp á regubundna hvalaskoðun allt árið. Fyrirtækið sem reið á vaðið með vetrarferðir er á Dalvík.

Þegar minnst er á hvalaskoðun dettur sennilega flestum Húsavík fyrst í hug. Við Eyjafjörð eru hins vegar þrjú fyrirtæki starfandi sem gera út á það að sýna ferðamönnum hvali; á Akureyri, Hauganesi og á Dalvík.

Hópur erlendra ferðamanna er mættur í Dalvíkurhöfn og er á leið um borð í Mána, annan tveggja báta sem fyrirtækið Arctic Sea Tours gerir út á hvalaskoðun. Núna er boðið upp á ferðir allt árið, búið er að útvíkka reksturinn með daglegum ferðum yfir vetrarmánuði. 

„Þetta er fyrsti veturinn. Það var svona spurningamerki hvað vð sæjum yfir vetrarmánuðina. En við höfum séð hnúfubak í öllum mánuðum ársins,” sagði Freyr Antonsson, framkvæmdastjóri Arctic Seatours, í samtali við Stöð 2. 

„Það var svona erfiðara frá janúar og fram í apríl. En frá maí og fram í desember er þetta bara mjög gott. Það er 99 prósent möguleiki á að þú sjáir,” sagði Freyr. 

En voru þá nógu margir túristar á ferðinni í vetur sem vildu borga fyrir hvalaskoðun? 

„Það voru ekkert margir í vetur. En þetta byggist bara upp. Þegar við byrjuðum 2009 þá voru heldur ekkert margir. En núna er þetta orðið mjög þétt.”

Bátar Dalvíkinga þurfa venjulega ekki að fara langt til að hvalir sjáist. Oftast dugar fimmtán mínútna sigling en aðalskoðunarsvæðið er rétt norðan við Hrísey. En hafa Dalvíkingar roð við Húsvíkingum í samkeppninni? 

„Nei, nei. Við erum langt á eftir ennþá, þrátt fyrir að vera með jafngott svæði,” svarar Freyr hlæjandi. 

Hann segir að um 200 þúsund ferðamenn fari í hvalaskoðun á Íslandi á ári, jafnvel fleiri í ár. 

„Þar er Reykjavík náttúrlega langstærst, 100-120 þúsund, Húsavík í kringum 70 þúsund, og við vorum að fara með í kringum 14 þúsund manns í Eyjafirði. Þannig að við þurfum að sækja töluvert á,” segir Freyr Antonsson hjá Arctic Seatours á Dalvík.