Einstök jólabjór til sölu í skemmtigarði Disney

Doppelbock jólabjórinn frá Einstök er til sölu í skemmtigarðinum Disney’s Hollywood Studios í Flórída um þessi jól. Hann er eini jólabjórinn sem Disney býður til sölu á veitingastöðum í skemmtigarðinum vinsæla, en kvikmyndarisinn endurnýjaði samning sinn við akureysku ölgerðina eftir góða reynslu síðustu jól.

„Dreifiaðilinn okkar í Flórída nálgaðist Disney fyrir um einu og hálfu ári síðan,“ segir Guðjón Guðmundsson, framkvæmdastjóri ölgerðarinnar. „Þeim leist vel á og þeir völdu Einstök í fyrra sem eina jólabjórinn sinn í Hollywood Studios. Það verður aftur þannig í ár.“

Hollywood Studios er einn allra vinsælasti skemmtigarður veraldar og í fyrra heimsóttu hann rúmlega tíu milljónir manna. Guðjón segist ekki geta greint frá því hversu mikið var keypt af Doppelbock bjórnum í fyrra en ljóst er að salan í garðinum telur talsvert fyrir ölgerðina.

„Fyrir okkur er þetta talsvert og ekki síður það að Epcot tók inn Einstök White Ale á krana í norska vagninum, segir Guðjón og vísar til annars skemmtigarðs á vegum Disney þar sem sýningarskála frá hinum og þessum löndum er að finna. „Þar fara þrír, fjórir kútar á dag. Það munar um fyrir litla ölgerð að selja það.“

Einstök bjór hefur verið í mikilli sókn á þeim þremur árum sem liðin eru frá því að hann kom fyrst á markað. Guðjón segir það magn bjórs sem ölgerðin flytur út árlega hafa tvöfaldast á hverju ári og í enn meiri aukningu stefni. Hann segir það ekki öruggt að Doppelbock jólabjórinn verði áfram á boðstólum í Hollywood Studios á næsta ári, það verði bara að koma í ljós.