Afar jákvæðar hagtölur fyrir Ísland

Þrátt fyrir að þjóðarbúið eigi ekki gjaldeyri til að standa undir afborgunum lána eru mjög jákvæð teikn á lofti í efnahagslífinu. Atvinnuleysi er lægra hér og hagvöxtur hærri hér en í flestum öðrum vestrænum ríkjum.

Í ritinu Fjármálastöðugleika sem kom út í dag og í kynningu Sigríðar Benediktsdóttur, framkvæmdastjóra samnefnds sviðs hjá Seðlabankanum, komu fram upplýsingar um mjög jákvæð teikn á lofti í íslensku efnahagslífi.

Afkoma stóru bankanna þriggja var góð á síðsata ári og skuldsetning þeirra er lítil.

Hagvöxtur var 3,3 prósent hér í fyrra en þetta er mesti hagvöxtur frá bankahruni og að mestu drifinn áfram af útflutningi. Hagvöxtur á Íslandi er hærri en í öðrum þróuðum ríkjum.

Kaupmáttur ráðstöfunartekna, þ.e. hvað fæst fyrir útborguð laun, jókst um 4,1 prósent í fyrra.

Viðskiptajöfnuður, þ.e. mismunur inn- og útflutnings mældist jákvæður í fyrra um 82 milljarða eða sem nemur 4,6 prósentum af landsframleiðslu. Hann hefur ekki verið meiri frá 2010.

Gjaldþrotum fyrirtækja hefur fækkað verulega frá 2011 en þá urðu 1.600 fyrirtæki gjaldþrota.

Skuldir fyrirtækja sem hlutfall af landsframleiðslu var 141 prósent í fyrra. Þetta hljómar mikið en þetta eru mjög góð tíðindi því skuldahlutafallið er nú svipað og í ársbyrjun 2005. Í lok árs 2008 var þetta hlutfall tæplega 400%.

Í þessari upptalningu vantar atvinnuleysi. Í febrúar var atvinnuleysi hér á landi 4,2 prósent en það er lægra en í öllum ríkjum Evrópusambandsins.

Aðeins Sviss og Noregur, hvorugt ESB-ríki, hafa lægra atvinnuleysi í ríkjum Evrópu en Ísland, samkvæmt opinberum birtum hagtölum vikuritsins The Economist fyrir febrúar sl.