„Þjóðarbúið hefur ekki efni á að leysa þetta út“

Fullkomin óvissa er um hvernig eigi að leysa úr krónueign slitabúa föllnu bankanna sem samkvæmt uppfærðu mati Seðlabankans nemur núna 497 milljörðum króna, eða þriðjungi landsframleiðslunnar. Þjóðarbúið framleiðir ekki nægan gjaldeyri til að leysa þessar krónur út. 

Seðlabanki Íslands kynnti í morgun nýjustu útgáfu rits um Fjármálastöðugleika á Íslandi en hluti ritsins er helgaður áhrifum uppgjöra slitabúa föllnu bankanna á þjóðarbúið. 

Fram kemur í ritinu uppfært mat á krónueign föllnu bankanna, þ.e. slitabúa þeirra, sem kröfuhafar bankanna eiga. Seðlabankinn áætlaði í október 2012 að þessi fjárhæð næmi 460 milljörðum króna. Nú er talið að samtals séu þetta 497 milljarðar króna, en um helmingur upphæðarinnar eru tveir viðskiptabankar, Arion banki og Íslandsbanki.

Fram kom í máli Sigríðar Benediktsdóttur, framkvæmdastjóra fjármálastöðugleika Seðlabankans, þegar ritið var kynnt að undirliggjandi viðskiptajöfnuður næstu ára dygði ekki til þess að leysa þessar krónueignir út, þ.e. skipta þeim í erlendan gjaldeyri. Seðlabankinn er í raun engu nær núna en fyrir nokkrum árum hvernig það eigi að gera. Viðskiptajöfnuður er mismunur á innflutning og útflutningi. 

Í raun þurfa Íslendingar að sýna ábyrgð þegar kemur að innflutningi því þjóðarbúið er ekki að framleiða nægan gjaldeyri, þótt ráð sé gert fyrir að viðskiptajöfnuðurinn verði jákvæður um 3,5 prósent af landsframleiðslunni að meðaltali á næstu árum. Það er bara ekki nóg. 

Þú myndir segja að þetta væri enn stór óvissuþáttur, þ.e þessi tæplega 500 milljarða krónueign slitabúanna? „Það er alveg ljóst að þjóðarbúið hefur ekki efni á að leysa þetta út í gegnum viðskiptajöfnuð. Það þarf einhverjar aðrar leiðir, hvort sem það er að þjóðarbúið selji erlendar eignir sem við teljum ekki vera raunhæft til þess að mæta þessu eða þá að einhverjar aðrar leiðir verði farnar.“

Hafið þið einhverjar hugmyndir um hvaða leiðir það séu? „Nei. Þessar leiðir er bara verið að skoða núna.“