Rammasamningur í áhættugreiningu í Noregi

EFLA verkfræðistofa hefur gengið frá rammasamningi við norsku vegagerðina, Statens Vegvesen, um áhættugreiningar fyrir vegi og jarðgöng en þetta kemur fram í fréttatilkynningu frá verkfræðistofunni.

EFLA var efst tólf norskra og íslenskra verkfræðistofa þar sem metið var út frá hæfni, skilningi á verkefninu og verði. Þetta er fyrsti rammasamningur EFLU í áhættugreiningu í Noregi.

EFLA er nú þegar með 7 aðra rammasamninga við norsku vegagerðina og var Statens Vegvesen annar stærsti viðskiptavinur EFLU árið 2013.

„Mikil þekking og reynsla í hönnun samgöngumannvirkja, í umferðaröryggismálum og áhættugreiningum hefur skilað sér í að EFLA stendur vel í norrænum samanburði, “ segir Bergþóra Kristinsdóttir, fagstjóri umferðar og skipulags hjá EFLU.

Nýverið lauk EFLA umfangsmikilli áhættu- og áfallaþolsgreiningu vegna lengingar á Óperugöngunum í miðborg Osló, þar sem beitt var ýmsum nýjungum til að tryggja ásættanlegt öryggi.

Auk þess hefur verið unnið að margvíslegum áhættugreiningum á vegum og jarðgöngum síðustu ár.