Snjallsímasala stóraukin milli ára

Sala snjallsíma jókst um 60 prósent í febrúar miðað við sama mánuð í fyrra, að því er fram kemur í samantekt Rannsóknaseturs verslunarinnar.

„Þó verslun sé smám saman að aukast á ný þá á hún enn langt í land með að ná fyrri styrkleika,“ segir þó í tilkynningu setursins.

Bent er á að miðað við febrúar 2008 hafi húsgagnaverslun dregist saman um 53 prósent að raunvirði, fataverslun um þriðjung og skóverslun um fjórðung.

„Á þessu fimm ára tímabili dróst dagvöruverslun saman um 7,4 prósent að raunvirði þrátt fyrir að landsmönnum hafi fjölgað um 3,2 prósent og fjöldi erlendra ferðamanna aukist um næstum 60 prósent,“ segir í tilkynningu Rannsóknasetursins.