Skilvísir viðskiptavinir fá ekkert

Íslandsbanki hyggst ekki endurgreiða 30 prósent af vöxtum húsnæðislána og skuldabréfalána eins og gert var á síðasta ári.

Tuttugu þúsund skilvísir viðskiptavinir bankans fengu í lok febrúar í fyrra endurgreidda samtals tvo og hálfan milljarð króna en verkefnið var kynnt sem gjöf frá bankanum.

Að meðaltali fékk hver viðskiptavinur um 120 þúsund krónur endurgreiddar.

Dögg Hjaltalín upplýsingafulltrúi Íslandsbanka segir að aldrei hafi verið ætlunin að endurtaka leikinn „Það var litið á endurgreiðsluna sem þakklætisvott fyrir tryggð viðskiptavina. Íslandsbanki vildi sýna í verki þakklæti til þeirra sem höfðu staðið í skilum í gegnum erfiða tíma.“

 

Endurgreiðsla bankans var gagnrýnd þegar í ljós kom að vaxtabætur sem greiddar voru af ríkinu skertust á móti endurgreiðslunni. Íslandsbanki sagði í svari sínu þá að útreikningar endurgreiðslunnar hefðu verið að tilmælum Ríkisskattstjóra sem farið hefði fram á leiðréttingu á vöxtum viðskiptavina bankans sem næmi endurgreiðslunni.

Leiðrétt upphæð vaxta lá svo til grundvallar ákvörðunar um greiðslu vaxtabóta úr ríkissjóði.