400 sóttu um sex störf

Meira en 400 manns sóttu um sex störf sem H:N Markaðssamskipti auglýsti til umsóknar í byrjun mánaðarins. Í tilkynningu frá H:N segir að óhætt sé að halda því fram að viðtökurnar hafi verið betri en búist var við.

„Viðbrögðin við auglýsingunum fóru fram úr okkar björtustu vonum, bæði hvað varðar fjölda umsókna og fjölda hæfra umsækjenda,“ segir Ingvi Jökull Logason, framkvæmdastjóri H:N Markaðssamskipta.

Þá segir hann H:N vera þakklátt fyrir áhugann og greinilegt sé að margt hæfileikafólk hafi áhuga fyrirtækinu. „Þetta voru aðeins sex stöður sem við auglýstum en við minnum á að H:N ætlar sér stóra hluti á markaðnum og mun á komandi tímum leitast við að bæta við nýju starfsfólki eftir því sem svigrúm leyfir,“ segir Ingvi.