Segja flugvirkja grafa undan samkeppnisstöðu og atvinnuöryggi

Samtök atvinnulífsins telja launakröfur flugvirkja óbilgjarnar, þeir hafi notið óvenju hagstæðrar launaþróunar undanfarin ár og séu með hærri laun en sambærilegir hópar. Þetta kemur fram í tilkynningu til fjölmiðla sem samtökin sendu frá sér í dag.

„Yfirlýsing formanns Flugvirkjafélagsins, í kjölfar þess að félagið dró verkfallsboðun sína tilbaka, um að hlé yrði á verkfallsaðgerðum í júlí, felur í sér að áfram vofir óvissa yfir ferðaþjónustunni,“ segir í tilkynningunni. Sú staðreynd að flugvirkjar hafi ekki dregið úr óbilgjörnum launakröfum sínum viðhaldi fyrrnefndri óvissu en mikilvægt sé að aðilar nái saman svo hægt sé að verja útflutnings- og samkeppnisgreinar landsins, öllum til hagsbóta.

Aðilar vinnumarkaðarins hafi unnið að því að undanförnu að breyta vinnubrögðum þegar kjarasamningar eru gerðir. Þetta sé gert í því skyni að standa vörð um samkeppnishæfni útflutningsgreina og treysta atvinnuöryggi á þeim vettvangi.

„Launkröfur flugvirkja og aðgerðir þeirra ganga þvert á þá stefnu með því að grafa undan samkeppnisstöðu flugrekstursins og atvinnuöryggi starfsfólks í ferðaþjónustu.“

Samninganefnd Samtaka atvinnulífsins og Icelandair reyndu til hins ítrasta að ná samningum við flugvirkja segir í yfirlýsingunni. Var boðið upp á hinar ýmsu útfærslur í nýjum kjarasamningi.