533 milljarða halli á lífeyrissjóðunum

Halli á lífeyrisskuldbindingum íslensku lífeyrissjóðanna nemur samtals 533 milljörðum króna. Íslenska lífeyriskerfið er þó öflugt, þrátt fyrir að ýmsir veikleikar séu til staðar.

Þetta kom fram á kynningarfundi Fjármálaeftirlitsins (FME) um stöðu lífeyrissjóðanna í morgun. Unnur Gunnarsdóttir, forstjóri FME, sagði þar stærð lífeyrissjóðanna, sem hlutfall af landsframleiðslu, eiga eftir að halda áfram að aukast á næstu árum. Heildareignir sjóðanna námu um 2.800 milljörðum króna í árslok 2013.

Unnur og Björn Z. Ásgrímsson, sérfræðingur á greiningasviði FME, sögðu nauðsynlegt að hækka iðgjöld sjóðanna á næstu árum og skoða hækkun eftirlaunaaldurs. Það væri hins vegar pólitísk ákvörðun sem yrði tekin af öðrum en stjórnendum Fjármálaeftirlitsins.

Á fundinum kom einnig fram að hrein raunávöxtun lífeyrissjóðanna var 5,4 prósent árið 2013 samanborið við 7,3 prósent á árinu 2012.

Björn benti meðal annars á mikilvægi þess að farsæl lausn finnist á vanda Íbúðalánasjóðs, þar sem lífeyrissjóðirnir eiga um tvo þriðju af útgefnum bréfum Íbúðalánasjóðs.