Össur hagnaðist um 4,7 milljarða króna í fyrra

Gervilima- og stoðtækjaframleiðandinn Össur hagnaðist um tæpa 41 milljón Bandaríkjadala á síðasta ári, eða sem svarar tæpum 4,7 milljörðum króna.

Fram kemur í ársskýrslu félagsins sem birt var í Kauphöll í gær að breytingin á milli ára nemi 8,5 prósentum, en árið 2012 nam hagnaður félagsins tæpum 37,8 milljónum dala (4,3 milljörðum króna).

Í árskýrslunni segir Jón Sigurðsson, forstjóri Össurar, að félagið hafi styrkt sölunet sitt og starfsemi með kaupum og vexti í Brasilíu, Noregi og Svíþjóð.

„Söluaukning á árinu var 9 prósent og sala í heild nam 436 milljónum dala [49,5 milljarðar króna].“ Jón segir söluaukningu hafa verið í Evrópu, Miðausturlöndum og Afríku og á öllum vörum félagsins. „Við sjáum líka hægan bata á markaðsaðstæðum í Ameríku.“

Í ársskýrslunni eru líka birtar upplýsingar um laun stjórnar og stjórnenda. Þar kemur fram að launagreiðslur til Jóns Sigurðssonar forstjóra hafi verið rúmlega 1,3 milljónir dala á árinu. Það jafngildir rúmlega 12,3 milljónum króna í laun á mánuði.