Færri fengu en vildu kaupa hlut í Kerecis

Nýsköpunarfyrirtækið Kerecis, sem er með höfuðstöðvar á Ísafirði, hefur tryggt 230 milljóna króna hlutafjáraukningu til að halda áfram þróun á lækningavörum sínum. Allir núverandi fjárfestar fyrirtækisins auka sinn hlut, auk tveggja nýrra fjárfesta sem koma að fyrirtækinu.

„Það gekk vel að ganga frá fjármögnuninni – það er talsverður áhugi hjá fjárfestum að koma að félaginu og komust færri að en vildu,“ segir Guðmundur F. Sigurjónsson, ­stjórnarformaður ­Kerecis. „Ég er sérstaklega ánægður með þennan árangur í ljósi þess hversu ungt félagið er.“

Guðmundur segir að fjármunirnir sem nú eru í hendi verði nýttir til að halda áfram þróun á stoðefnum sem ætluð er til notkunar við kviðsliti, endursköpunar á brjóstum eftir brottnám vegna krabbameins, og heilabasts, en það er efnið á milli höfuðkúpu og heilans sem getur rofnað vegna slysa og krabbameins. Eins verður nýtt hlutafé notað til að halda áfram markaðssetningu á MariGen Omega3-vörunni, sem er stoðefni til meðhöndlunar á þrálátum sárum sem eru alvarlegt heilbrigðisvandamál um allan heim.

Kerecis tryggði sér markaðsleyfi í Bandaríkjunum fyrir MariGen Omega3-sáravörur sínar síðasta haust. Það var að sögn Guðmundar mikilvægt skref fyrir fyrir­tækið, en Bandaríkin eru stærsti markaður heims fyrir vörur fyrirtækisins og veltir 900 ­milljónum dala á ári – og er í örum vexti.

Fyrirtækið fékk einnig markaðsleyfi í Evrópu í fyrra og er sala þegar hafin á Íslandi og Bretlandi í kjölfar þess, ásamt nokkrum löndum í Mið-Austurlöndum. Sala á öðrum mörkuðum er í burðarliðnum auk þess sem Kerecis vinnur að öflun markaðsleyfa annars staðar í heiminum, til dæmis í Kína og á Indlandi.

Tveir nýir bætast í fjárfestahóp Kerecis

Fjárfestarnir sem koma nýir að Kerecis eru í fjárfestahópnum Capital ehf., sem er í eigu Sigurbjörns Þorkelssonar, fyrrverandi bankamanns og eins af eigendum Haga, og 1924 ehf., sem er meðal annars í eigu Haraldar Jónssonar, fyrrverandi forstjóra Innness og stjórnarformanns Haugen Gruppen.

Fyrir í fjárfestahóp Kerecis voru Nýsköpunarsjóður atvinnulífsins, Omega3 ehf., sem er fjárfestingarsjóður tengdur Novator í Lundúnum, og vestfirsku sjávarútvegsfyrirtækin Klofningur og Hraðfrystihúsið–Gunnvör hf.

Meðhöndlun á þrálátum sárum

MariGen Omega3 er þorskroð sem fellur til hjá sjávarútvegsfyrirtækjum á Vestfjörðum og með­höndlað hefur verið þannig að allar frumur og ofnæmisvaldandi efni hafa verið fjarlægð úr roðinu.

Fyrir á markaðnum eru stoðefni sem unnin eru úr húð, þvagblöðrum, þörmum og gollurhúsum svína, manna og nautgripa. Stoðefni úr fiski gefur því ákveðið forskot þar sem ekkert er um trúarlegar hindranir, eins og þegar um vörur úr svínavef er að ræða. Þá smitast ekki sjúkdómar úr fiskum í menn, ólíkt vefjum manna og dýra.