Hagkaup innkallar barnaföt

Neytendastofa hefur innkallað barnaflíkur frá Hagkaup þar sem bönd í flíkunum eru of löng og geta valdið slysahættu. Frá þessu er greint á heimasíðu Neytendastofu.

Um er að ræða annars vegar lillabláar buxur af gerðinni Kids up, með lausum og löngum böndum í buxnastreng og hins vegar úlpu í grænum felulitum af gerðinni Rebus með böndum sem hanga niður fyrir fald. Þá er einnig vakin athygli á úlpu frá Weather Report en þar þarf að fjarlægja rennilásatogara sem er of langur. Ekki er krafist innköllunar á úlpunni en boðið er upp á aðstoð fyrir þá sem þess óska við að fjarlægja bandið.

Neytendastofa hvetur þá sem keypt hafa ofangreindar flíkur að snúa sér til Hagkaupa og skila þeim eða fjarlægja umrædd bönd.