Spá því að vísitalan hækki um 0,1%

Hagstofa Íslands birtir marsmælingu vísitölu neysluverðs miðvikudaginn 26. mars en Hagfræðideild Landsbankans spáir því að vísitalan hækki um 0,1% milli mánaða.

Gangi spáin eftir mun ársverðbólgan lækka um 0,1 prósentustig; úr 2,1% í 2,0%.

Tólf mánaða verðbólgan skýrist nær eingöngu af  tvennu; þjónustu og húsnæði, en þessir tveir undirliðir eru um 52% af vísitölu neysluverðs. Það að verðbólgan skýrist fyrst og fremst af þessu tvennu  má rekja til gengis krónunnar, en hún hefur styrkst  um tæp 6% gagnvart evru síðan um miðjan  nóvember.

Gangi sú styrking að einhverju leyti til  baka má búast við að framlag innfluttra vara til  verðbólgunnar aukist. 

Bráðabirgðaspá Hagfræðideildar gerir ráð fyrir að  VNV hækki um 0,3% í apríl, 0,2% í maí og 0,2% í  júní. Gangi spáin eftir mun ársverðbólgan vera 2,1%  í júní.