Íslenskt hugbúnaðarfyrirtæki gefur út jarðvangaöpp

Íslenska hugbúnaðarfyrirtækið Locatify hefur gefið út öppin Gea Norvegica og Magma Geopark í samstarfi við jarðvanga í Noregi en þetta kemur fram í fréttatilkynningu frá Locatify.

Smáforritin eru sett upp í Creator CMS kerfi Locatify sem gerir notendum kleift að setja upp sín eigin leiðsögu- og ratleikjaforrit á einfaldan hátt.

Í nýju öppunum er hægt að hlaða niður snjallleiðsögnum, hlusta á frásagnir, skoða myndir og kort án þess að vera á söguslóðum eða nota GPS til að virkja efnið sjálfkrafa á réttum stöðum. 

Jafnframt er gestum jarðvanganna boðið í ratleiki þar sem þeir læra að þekkja umhverfið á meðan á heimsókn stendur. Jarðvangarnir sjá sér hag í að nota forritin jafnt fyrir skólahópa og ferðalanga sem leika sér um leið og þeir kynnast sérstöðu landsvæðanna.

Locatify hefur áður gefið út leiðsagnaforritið SmartGuide North Atlantic sem m.a. hefur verið notað til að setja upp leiðsagnir víða um Ísland og á Norðurlöndunum. Þá hefur fyrirtækið gefið út ratleikjaforritið TurfHunt sem hefur verið notað til að setja upp ratleiki m.a. fyrir skóla og starfsmannafélög þar sem leikendur keppa utandyra til sigurs. 

Mörg öpp hafa verið hönnuð í vefkerfi Locatify og sérmerkt aðallega fyrir erlenda viðskiptavini.

Alls hafa 13 öpp verið gefin út og sett upp í kerfi Locatify þar á meðal; Iceland Film Location sem í eru myndbrot úr íslenskum kvikmyndum, Touround í Þýkalandi og Lúxemborg og StrollOn um borgir í Evrópu.

Auk þess hefur Locatify forritað annars konar öpp; ferðavenjukönnun sem skráir ferðir þátttakenda, viðburðaforrit og ferðahandbók.

Eigendur fyrirtækisins eru þau Leifur Björn Björnsson og Steinunn Anna Gunnlaugsdóttir.